الثورة و ما بعدها كانت منشوراً رفيعاً للحب تعلمنا منه ما لم نكن نعلم و فهمنا معه اشياءً كثيرة من ما لم نكن نفهم

و فوق صفحات هذا المنشور كُتب الكثير و الكثير من مشاعر و احلام الأبرياء 

فسُطرت الصفحات و الصفحات

و اخذنا نقرأ من ما كُتب و ننهل و نستمتع

و بينما كنت اتجول في اروقة هذا المنشور البديعه توقفت عند صفحة عنوانها

" الشعب يريد تطهير البلاد "

" تأملت هذه العباره كثيراً "

و رأيت الجميع يرددونها بعد الثورة و يطالبون بها بحماس....و رغبه صادقه

سائق الميكروباص يرديها بقوة ليتخلص من بعض ظباط الشرطه الغير شرفاء الذين كانوا يمتصوا دمائه

طالب المدرسه و الجامعه يرديها بقوة ليتخلص من الإضطهاد و المحسوبيات و الوسائط و الدروس الخصوصيه

الفنانون يرددونها لأن قلوبهم تنزف دماً من فرط حساسيتهم و مواكبتهم للشعب المقهور و الفئات الضائعه حقوقها

و س و ص و ع يرددونها من قلوبهم و الكل يريد ذلك بشده


*******


و لكنى توقفت في ذهول يا ترى كل هذه الفئات فاهمه يعني ايه تطهير و طهارة و تطهر

و اللا كل واحد مننا عايز تطهير تفصيل على مزاجه

فالسائق الذي يريد تطهير البلاد من الضباط غير الشرفاء ما زال بيمشي عكسي في الشوارع
و الأحياء الرئيسيه في القاهره بعد الثورة اكتر من قبل الثورة ..

بيكسر اشارات ....بيسوق بجنون و هو شارب مخدرات ....بيغلّى الأجرة استغلالاً منه عشان المواصلات العامه في اضراب و مفيش لسه شرطه توقفه عند حده

بيقف على مزاجه في اى وقت دون سابق انذار ....بيروع الآمنين في الشارع لأنه بيهددهم بالحوادث او بيتكربها بالفعل

و الفنان الذي يريد الإصلاح السياسي من اجل مستقبل افضل للبلاد يري ان الحجاب شئ متخلف جداً و انه دليل على تدهور الحالة الحضاريه لمصر مع ان مفيش ديانه سماويه مفيهاش الحجاب

اليهوديه و المسيحيه و طبعاً الإسلام كلهم فيهم حجاب المرأه

 فعلى اى دين يريد هذا الفاضل ان تتطهر و تتحضر البلاد ؟؟؟؟؟

الشباب يا جماعه اللى بيشربوا مخدرات و خمور و بردوا بيطالبوا بالتطهير عشان هذا حقهم كبنى آدمين على ارض مصر ..

الشباب الصغيرين 15 سنه و 16 سنه اللى بيشتكوا من التعليم و اللى فيه و بينادي بتطهير اسمحوا لى اسألكم سؤال واحد كام واحد فيكم بيغش في الإمتحانات

او خلينا نسأل السؤال بالطريقه الصح كام واحد فيكم مش بيغش في الإمتحانات

الشباب اللى بيصاحب بنات اعتقد و الله اعلم ان جميع الديانات السماويه اتكلمت في الحق و الخير و الحب و السلام و الإحترام و الأخلاق و الحشمه معتقدش حنلافي حد محترم في الكون و من اى ديانه سماويه بيقول ان الصحوبيه حلال و حق مشروع للشباب

حضرتك نزلت تتظاهر انت و صديقاتك و عايزين تقيلوا رؤساء و وزراء و مديرين

يا ترى تقدر تقول لصديقاتك البنات انا اول واحد حتطهر من جوايا و مش حصاحب بنات

انا اسفه انا مش بحكم على حد و مش عايزه حد يظن اننى اتجنب ذاتى و انا اتحدث عن التطهر و كأننى الملاك


انا كمان واجهت نفسي بكل عيوبي و اخطائي و ذنوبي

 و اجبرت نفسي مطلبش من الناس تتطهر اللا لمّا انا كمان اتطهر من كل ذنوبى او على الأقل اعترف بها و اسعى لإنهائها

و اكتب لكم اليوم و فقط بعد انقطاع شهووووووور عن الكتابه كنت فيها بالفعل ارمم ما صدأ من النفس بفعل الزمن


الناس اللى بتكدب زي المايه و الهواء و فاهمين ان الكدب ده شئ طبيعي من ضروريات الحياة من فضلكم يا جماعه تقولوا لهم يبطلوا كذب

قولوا لهم " الشعب يريد تطهير البلاد " بطلوا لو سمحتم كدب

احنا خايفين قوى من المسؤلين و الإعلام لا يطلعوا كدابين علينا ..بنطالب بالتطهير عشان نلاقي حد نصدقه

خلونا نطهر نفوسنا من الكدب عشان ميبقاش على الأرض او في البلد كدابين غيرهم ساعتها حنقدر بجد نقضي عليهم و نمنعهم من الكدب

احنا يا جماعه كبرنا على حديث الرسول صلى الله عليه و سلّم " اذا صلُح امر الراعي صلُح امر الرعيه " و حديث الرسول صلى الله عليه و سلّم " كلكم راع و كلكم مسؤل عن رعيته "

و لكن ما حدث في الثورة انها بدأت من الأصغر للأكبر

... يعني الصغير هو اللى اخد بإيد الكبير ...و راح يحارب طواحين الهواء

لذلك ادعوكم لثورة تطهير للنفوس و برده عندي امل

ان الرعيه اللى تاخد بإيد الراعي و تنور له طريق الصح

و لا اقول نعلم كبارنا لا سمح الله و لكن خلونا فقط نفكرهم بالقيم الجميله اللى ربونا عليها زمان

مترموش ورق في الأرض عشان باباكم و مامتكم اللى علموكم الكلام ده زمان و نسيوا في زحمة الحياة من الهموم يرجعوا يفتكروا الكلام ده على ايديكم

امنعوا انفسكم من الكذب و من الغش عشان مدرسة المدرسه لو غششت حد او ساعدت حد على الغش او كذبت تقدر تقول لها بقوة و ثبات من فضلك اسمعى نصيحتنا المتواضعه يا مس

و لو حد عزم عليك بسيجارة او اخواتها قول له بقوة مبدخنش

لو حد لف و دار في الكلام قول له مبكذبش آسف مش حشترك معاك

و لو حد هزر معاكي من زميلات المدرسة او عيلتك او الجيران و قال لك يا ترى بقى عامله ايه مع الجو

قولى له بقوة مبصاحبش


انا مش بنصحكم يا جماعه و لا املى ارداتى عليكم

و لكنى فقط كنت اتصفح و اقرأ بصوت عالى صفحة " الشعب يريد تطهير البلاد " من منشور الحب لله ثم الوطن المسطور داخل قلوبكم انتم ..و ما اردتم ان تقولوه انتم من ارادتكم انتم

شكراً

منار ممدوح عقل

اللهم اجعلنى خيراً مما يظنون و اغفر لى ما لا يعملون و ارحمنى يوم يبعثون