نحاول في هذا المقال أن نقدم بعض لنصائح الصحية المفيدة للشباب ليكون أكثر حيوية ونشاط ويكون قادر على العيش والإنتاج  وإليكم يا شباب هذه النصائح فيا حبذا لو ننفذها مع بعض, وكن على يقين أن حياتك ستتغير إلى الأحسن إن شاء الله وستكون سبب للوقاية من الكثير من الأمراض.

أولا: لابد من ممارسة الرياضة وياريت تكون يوميا ومش شرط انك تذهب لصالة ألعاب أو تكون رياضي محترف عشان تحصل على فوائد الرياضة يكفيك أنك تمشى يوميا نصف ساعة بس ياريت يكون المشي بسرعة وبانتظام وده بيحميك من أمراض القلب ولو مش هتقدر تمشى يوميا ممكن تمارس تمرين رياضية ثلاث مرات أسبوعيا  لأن ممارسة الرياضة بتحميك من أمراض كتير.

ثانيا: عايزك تكتر من أكل الخضروات والفاكهة وخصوصا الطماطم والعنب الأحمر فهذا يساعدك على تجنب الكثير من الأمراض مثل جلطة الدماغ وداء السكر.

ثالثا: ابتعد عن التدخين بأي طريقة لأنها تسبب أمراض خطيرة جدا مثل أمراض القلب والرئتين والسرطان وبرغم كل ده أنا عايزك تسيبها من اجل الله لأن أنت أكيد عارف إن هي حرام.

رابعا:أنا بصراحة عايزك متتكلمش في المحمول كتير عشان الأشعة التي تصدر منه تضر بجهازك العصبي وعشان أوفر لك برضه , أنا خايف عليك لأن فعلا الأشعة الكهرومغناطيسية الصادرة منه ضارة جدا فياريت متستخدموش إلا عند الحاجة.

خامسا: اشرب ما يعادل 8 أكواب يوميا من الماء وفى الحر اللي إحنا فيه ده لازم تزود الكمية لأن الماء بيساعد الجسم على التخلص من الفضلات والسموم وكمان بيحافظ على درجة حرارة الجسم العادية.

سادسا: أنا عايزك تهتم بصحتك شوية فياريت تعمل فحص شامل كل مدة وليكن كل  ستة شهور أو كل سنة بس المهم تعمل لأن صحتك أمانة لازم تحافظ عليها.

 وإليك الآن بعض النصائح الخفيفة:

1-لا تشرب الشاي أو أي شراب وهو ساخن لأن ده ممكن يعرضك للإصابة بسرطان الفم أو المريء.

2-امضغ الطعام جيدا.

3-لا داعي للعجلة السرعة خذ وقتك في إنجاز الأعمال حتى لا تؤدى السرعة لارتفاع ضغط الدم

4-تناول السمك ولو مرة واحدة في الأسبوع لأنه يحتوى على كثير من البروتينات وده يقلل من الوفيات بسبب جلطات الدماغ.

5- المفروض نقلل القهوة للحوامل والمصابين بارتفاع ضغط الدم.

6- قلل من تناول الدهون وتجنب الطعام المقلي قدر المستطاع.

نصيحة أخيرة:

أنا عايزك بعد ما تقرأ المقال لو عندك بعض النصائح ممكن تفيد الشباب ياريت تبعتها لنا ولو مفيش ممكن تقولنا رأيك في الموضوع أو لو فيه مقترحات ياريت متبخلش بها علينا

ibn_domiat@yahoo.com