اشمعنى أناااا؟؟؟؟

ليه أنا مش غني؟

ليه مش ناجح؟

كل ده أسئلة بدور في دماغ الشباب و معظم شبابنا إما محبطين أو متشائمين ودايما يسأل الأسئلة ده

مع أننا خلقنا في أحسن تقويم وكلنا لدينا مزايا كتيرة غالبيتنا مش حاسس بها ولا عارف أهميتها

 ولا حاسس بكم النعم اللي ربنا رزقه بها

 قال تعالى "وأن تعدو نعمة الله لا تحصوها"

نعمة واحدة مش هنعرف نعد أد أيه ربنا كرمنا فيها  فأن كنت تملك المال فهناك من لا يملكه ومن ليس لديه المال أكيد ربنا كرمه من ناحية أخرى وسمعت جملة مش عارف مصدرها بتقول أن  ربنا  أعطى كل منا 100% من النعم لكن متنوعة أسهلها لك "على رأي حسن حسني " يعني لو أن 10% مال مثلاً هتلاقي ربنا كرمك ب 90% من نواحي أخرى يعني هتلاقي صحة كويسه أولاد صالحين زوجة طيبه وهكذا ولعلمك المال قد لا يكون في كتير من الأحوال مصدر للسعاده لأن السعادة شيء داخلي نابع من داخلنا وليس شيء خارجي متمثل في أموال أو ما شابه  مثلا انظر في السجون هتلاقي من أصحاب المليارات الكتير منهم في السجون فهل نفعتهم أموالهم لا والله

فاحمد ربنا على ما كرمك به من النعم 
وتذكر قول رسول الله صلى الله عليه وسلم :
" ارض بما قسم الله لك تكن أغنى الناس " رواه أحمد .

وكلامي ده مش معناه أنك ماتكنش طموح لأ بالعكس علينا أن نكون طموحين

ودايما ندور على التفوق والرقي في حياتنا بس كلامي كله منصب على  أننا نكون راضين بما قسمه الله لنا ولا نحسد الأخرين على ما أعطاهم الله لهم فتلك أرزاق قد قسمها الله بين الناس قال تعالى"أَهُمْ يَقْسِمُونَ رَحْمَةَ رَبِّكَ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِيَتَّخِذَ بَعْضُهُم بَعْضًا سُخْرِيًّا وَرَحْمَتُ رَبِّكَ خَيْرٌ مِّمَّا يَجْمَعُونَ"

وأهم شيء أحب أقوله أننا نحاول ننظر لنفسنا نظرة إيجابية وأن لا ننتقص من قدر أنفسنا لأننا لو عملنا كده هنخلي الأخرين ينتقصونا فلا نتعالى على الأخرين وأيضاً لا ننظر لأنفسنا بنظرة سلبية  ودايما نحاول ننظر للأمور بنظرة إيجابية ولا نتشاءم قال صلى الله عليه وسلم مبلغا عن ربه في حديث قدسي:
((أنا عند حسن ظن عبدي بي فليظن بي ما شاء))