|
همّ البنات اتجننوا ليه ؟؟؟؟؟
المحرر : منار ممدوح عقل
السلام عليكم و رحمة الله و بركاته
عزيزتي القارئه ..عزيزي القارئ
قبل ما ابتدي الكلام عن الموضوع بتاعنا يهمني أوضح ملحوظه هامه لحماية حقوق المليكه الفكريه و هو ان عنوان مقالاتى اقتبسته من اغنية كنت بسمعها في حفلات السمر في الجواله في كليتنا الحبيبه هندسة عين شمس و للأسف معرفش مين الزميله او الزميل اللى ابدعوا عنوان الأغنيه دي عشان اقول اسمهم
و كلامي بعيد عن معنى الأغنيه و لكن فقط العنوان لاقيته مناسب للكلام اللى حقوله اليوم لذلك استلفتها
النهارده بقى يا جماعه عايزه اتكلم عن موضوع مهم قوى ابتديت اخذ بالى منه لمّا المدام فلانه قررت تخطب لأخوها السيد فلان
راحت متوجهه لأحد السيدات الفاضلات التى تساهم في حل ازمة المجتمع لتعارف الطرفين على بعضهم البعض اللى هي بالبلدي زمان كانوا بيسموها الخاطبه ...بس الخاطبه بتاعتنا بقى موديل 2009
المهم المدام فلانه راحت رايحه على طنط الخاطبه و قالت لها
يا طنط الحاجه انا اخويا مش طويل قوى عشان كده عايز واحده تكون مش طويله قوى زيه
يا طنط الحاجه انا اخويا وسيم عشان كده عايز واحده جميله زيه
يا طنط الحاجه انا اخويا ابيض البشره عشان كده عايز واحده تكون بيضاء زيه
يا طنط الحاجه انا اخويا من سكان مدينة نصر عشان كده عايز واحده تكون من سكان مدينة نصر زيه
و طبعاً هي مع احترامي لمدام فلانه شروط متخلفه قوى اللى بتطلبها دي
بس ما علينا ده مش موضوعنا النهارده و انا عايزه اركز مع حضراتكم و مشتتكوش منى عشان كده خلينا مجازاً نقول انه لغاية دلوقتي " عداها العيب و ازح"
ليه بقى عشان دي رغبات اخوها السيد فلان و ده مزاجه هو حر بقى يختار شريكة حياته بالطريقه اللى تريحه و على رأى المثل " من حكم في ماله ما ظلم " بس الحقيقه بقى النص التاني من الحوار هو اللى مكانتش عندها حق ابداً مدام فلانه فيه
لأن طنط الخاطبه اعطت الرقم بتاع العروسه المنتخبه للمدام فلانه و قالت لها منك ليها بقى و انتوا احرار
تررن ...تررن تررن ..تررن
ده صوت جرس التليفون في بيت العروسه المنتخبه
من سوء الحظ والدتها هي اللى ردت على مدام فلانه اخت العريس السيد فلان
مدام فلانه طلبت تكلم العروسه مباشرة ..مامتها قالت لها نقول لها مين
ردت مدام فلانه بإندهاش :انا واحده عايزاها
مامة العروسه : ايوة واحده عايزاها في ايه يعني و مين انا مامتها
مدام فلانه بإندهاش برده : هو يعني حضرتك لازم تعرفي كل حد بيتكلم مع بنتك مين و حيكلمها في ايه
عموماً انا من طرف ام " ..." و هي رشحت بنتك لأخويا
مامة العروسه : تشرفنا
مدام فلانه : يا ريت تناديها لى بقى عشان عايزه اسألها في شوية حاجات
مامة العروسه : معلش حضرتك الكلام معايا انا و والدها
مدام فلانه بإندهاش برده : الله هو مش هي اللى حتتجوز و هي اللى حتقول رأيها يبقى لازم اتكلم معاها هي
مامة العروسه : لمّا ان شاء الله اتعرف على حضرتك الأول وتشرفونا في البيت تبقى تتكلم مع حضرتك و مع اخوكي زي ما انتى عايزه
مدام فلانه بإستياء : حضرتك صعبه قوى عموماً انا كنت عيزاها توصف لى شكلها عامل إزاى ..طولها كام سم ...وزنها كام كيلو ...لون بشرتها ..كده يعني
و بعدين كنت عايزه اجيلكم في البيت لوحدي مرة الأول اشوفها تعجب اخويا او لأ و لو لاقيتها تنفع ابقى اجيبه ان شاء الله و نيجي
اصلى بصراحه يا طنط موضوع الوزن ده اخرنى انا شخصياً في زواجي كتير و بعدين في الآخر اضطريت اتزوج من واحد كبير قوى عني في السن و عنده طفل بربيهوله ...عشان كده بيهمني اسأل على الوزن بالذات و اشوف العروسه قبل ما اخويا يشوفها
مامة العروسه بأدب : بعد كلام كتييييييييييييير حاولت تفهمها فيه الصح من الغلط و لكن بكل اسف منفع قالت لها معلش يا بنتى كل شئ قسمه و نصيب
انا اسفه مبجوزش بناتى بالكيلو
و الله عندها حق
هي مين دي اللى عندها حق مدام فلانه ؟؟؟؟؟؟؟؟؟؟؟؟؟
لأ طبعاً مامة العروسه هي اللى عندها حق
و طبعاً برده رغم الأخطاء الكتيييييييييييييير اللى في حوار مدام فلانه
و اللى كتير منها مش في صلب الموضوع زي مثلاً فكرة انها تنازلت و قبلت رجل كبير في السن عنده طفل ...مين قال ان ده تنازل ..ما يمكن يكون هذا الرجل افضل 100 مرة من شاب معندوش حاجه مرتبط بيها ...انما ما علينا عشان ده برده مش في صلب موضوعنا خلينا نقول ان الغلطه اللى تخص الموضوع
هي انها اعطت لنفسها حق القبول الذي منحه الله و رسوله الكريم صلوات الله و سلامه عليه لشريكين الحياة
مش مطلوب من حضرتك يا مدام فلانه انك انتى اللى تقبلى العروسه الأول
و مش مطلوب كمان انك لو قبلتيها يبقى اخوكي يقبلها على طول
...و مهما عرفتى ذوق اخوكي و شروطه ...عمرك ما حتقدري تخمنى تلك اللحظه القدريه
التى يلتقى فيها نصفان خلق الله كل منهما للآخر
روحان يبحث كلاهما عن الآخر
تلك اللحظه التى تنهار امامها كل الشروط ...و تتكسر امامها القواعد و النظم
فقط .....لأن الله اراد
كمان كلامها "مدام فلانه يعني " ملوش غير معنى واحد انها اتعقدت من اختيار المجتمع الجائر ليها فبتحاول هي كمان
تظلم زي ما انظلمت
كلامها ترجمته انه اشمعنى مفيش شاب وسيم في مقتبل العمر تنازل و قبل بيّا يبقى انا كمان اشمعنى اخويا ..هو كمان من حقه يقعد على البساط و يختار ست البنات
الموضوع ببساطه .....انسانه اتعقدت و بتساهم بدورها في تعقيد كل من حولها ...اكتر ما اصلاً امور الحياة متعقده
و السبب تافه و بسيط السبب هو ان المجتمع مقبلش يتعامل معاها معاملة بطلات الأساطير
البطله اللى ممكن تكون في الأول فقيره غلبانه ...لكن بالحب و الحنان و الإهتمام من احدهم بتتحول لأميره متوجه
البطله اللى بتكون شرسه او همجيه الطباع و بالترويض و الصبر و الرعايه من احدهم بتتحول لبرنسس من الطبقه الراقيه
البطله اللى بيتكون قبيحه و منبوذه و ضعيفة الشخصيه و لكن بالدفء و الحنان و قوة ايمان احدهم ببمزاتها و جمال روحها الدفين و جمال شخصها المختبئ ..بتتحول لشخصيه بارزه محط انظار الجميع و محور اهتمامهم
كل واحده او كل واحد على الأرض ممكن يكون اروع شخص عرفه الكون لو فقط اصبح محور اهتمام احدهم
لكن المجتمع اللى احنا فيه مش عايز كده ...عايز بطلات و ابطال جاهزين
هو احنا لسه حنمثل سيدتى الجميله
ما الجميلات كتير و على قفى مين يشيل ...انا ايه اللى يغصبنى
هكذا يتحدث 78% من افراد المجتمع وطبعاً دي مش احصائيه رسميه و لكنها فقط من تقدير احساسي
تعرفي !!!!!!!!! .....من حقهم يفكروا كده لأنهم معانوش زيك
انتى يا من اكلمك اليوم و اكتب هذا الموضوع من اجلك
ليه تجنى على مستقبل اخوكي او ابنك
ليه تكوني جزء من مجتمع ظلمك ...ليه تقفى في صفه و تعينيه على ظلم اخريات ؟؟؟؟؟؟؟؟؟؟؟
كل واحده في الدنيا تتمنى لأخوتها او ابنائها اجمل عرايس و عرسان في الدنيا
لكن من الإنصاف انك تحددي الأول معانى الجمال و حدودها بدقة
بعد كده همّ احرار يكون ليهم طريقتهم بقى في الحياة و الإختيار ان شالله تطلع طريقة متخلفه
بس المهم متكونييش انتى السبب ...و لا حتى تكوني جزءعدد الزيارات : 598
مقالات ذات صلة :
المزيد.......
التعليقات :
|
|
نرمين
هي اخت العريس اللي هتجوز واللا هو
مقالك جميل يا منار فعلا اللي بيحصل ده مش منطقي بالمرة يعني هما مش داخلين على كليو طماطم يشتروه
|
fadwa
الغريب
الغريب ان اكثر المعنسات من الجميلات لن تصدقي الشاب الان اصبح لايهمة الجميلة لان كلة في الغالب بقي صناعي فبيقول النصف جميلة مضمونة من وجهة نظرة
|
نوران
عندك الحق
الغريب فعلا هو تدخل الناس الزائد عن الحد. ففعلا تجد ان من حول الفتاة او الشاب سواء كانت الام أو الاخت او ...اى من الأقارب تنتظر الى أخر لحظة لتقول ليه تاخد\ى حد زى فلان\ة ...و انا اتمنى مثلك ايضا يا استاذة منار ان يراجع كل شخص نفسه عند النصائح و لا يأخذ بظواهر الأمور.
|
حاتم محمد
شكرا يا اخت منار
احب احييكي لطرحك للموضوع المهم دا ومشاركتك وايجابيتك ورغبتك لتغيير عقلية الناس اللي بتفكر بشكل خاطيء والحمدلله دا بيدي امل ان لسة في ناس قادرة تدي لمجتمعها وتنصح عشان المجتمع يتخلص من عاداته السيئة وسلبياته
|
يسرا محمود
جزاك الله خيرا
جزاكِ الله خيرا على موضوعك الهام ويا رب ينفع بيه كل من يقراه
|
Moni zaki
klam gmiiiiiiiiiiiiiil gdan
f3lan bark allah feki w hdaky w hda el moslmeen gmy3an amiiiin ya rub yareet el nas tfhm haza el klam el ra32 w gzaky allah alf 5eer 2o5ty el 3'alyaa
|